Sámi dearvvašvuođafierpmádaga birra

Sámi dearvvašvuođafierpmádat lea bargan 2017 rájes ovddidit buori dearvvašvuođa ja divššu seamma eavttuin eamiálbmogii sápmelaččaide. Fierpmádat fátmmasta Norrbotten regiovnna, Västerbottena regiovnna, Jämtlándda Härjedalena regiovnna ja Dalarna regiovnna. Juohke regiovnnas lea sámi dearvvašvuođa leanakoordináhtor ja máhttofierpmádat mas leat bargit geain lea sámi giella- ja kulturgelbbolašvuohta.

Mis lea maiddái stivrenjoavku ja politihkalaš referánsajoavku. Lassin regiovnnaide leat dás fárus Sámediggi, Ruoŧa sámiid riikasearvi, Sáminuorra, Landsförbundet svenska samer, riikorganisašuvnnat Samerna ja Same Ätnam.

Barggu vuođđun lea Strategi för samiska hälsa – en hälso- och sjukvård som bidrar till en god och jämlik hälsa för samer 2020-2030 – dokumeanta maid buot regiovnnat ovttasbarggus leat váldán atnui. Strategiija čilge movt regiovnnat galget ovdánahttit giella- ja kulturheivehuvvon dearvvašvuođa- ja buohccidivššu mii vuhtii váldá kultuvrra, giela ja sámi pasieantta eallineavttuid.

Sámi dearvvašvuođafierpmádaga vuolggasadji lea vuoigatvuođaperspektiiva ja bargá oažžut regiovnnaid áimmahuššat sápmelaččaid vuoigatvuođaid eamiálbmogin.

Mis leat vihtta oassemihtu:

Oahpahit

Mii loktet kulturgelbbolašvuođa divššus, lasihit máhtu eamiálbmotvuoigatvuođaid birra ja ovdánahttit doarjaga kultursensitiiva dearvvašvuođadeaivvademiide.

Ovdánahttit

Mii doarjut regiovnnaid ovdánahttimis buori ja lagas divššu sápmelaččaide. Mii guorahallat iešguđetlágán čovdosiid, ovdamearkka dihte digitaliserema ja strategalaš gelbbolašvuođaváráiduhttima, áinnas ovttasbarggus iežáiguin.

Čalmmustahttin

Mii bargat láhčit saji sámegillii ja sámi kultuvrii dearvvašvuođa- ja buohccidivššus.

Lasihit máhtu

Mii fuomášuhttit diehtoráiggiid ja ovttasbargat ovddidit ehtalaš sámi dearvvašvuođadutkama.

Duohtandahkat

Mii bargat sámi dearvvašvuođa našuvnnalaš máhttoguovddáža ásaheami ovddas.